بيت الرزغة واخذهم لثارهم

بيت الرزغة لي شبـــوا فـــتيــــل الــــحـــرب
في بروم وفـــي فـــــــوة حـــــرب الانـــتقــام
خلوا سيبـــــــــان شــــــاردة في كــــل درب
ويذكرو لي صار بهم في كـــــــــــل عــــــام
ماينسون والواحد منهم بيــــــــــــتة خــــرب
من افعال الاسود والذئب لي ماينــــــــــــــام
خلوهم يكرهوا اكلـــــهم والشـــــــــــــــــرب
والقصة انا باسوقها في هذا المقــــــــــــــــام
قصة عجيبة غريبة نادرا ماترتـــــقـــــــــب
قصة لازود فيها ولا نقص الا التــمــــــــــام
ابوالرجال خطم بعيرة وشل بنتة للحطــــب
وجوا سيبان للعاقل بلا حتى ســــــــــــــــلام
والجهل في هذة اللحظة هو لـــــي غلـــــــــب
رصاصة بالغلط ماهي طايشة من امــــــــام
استغلوا شيبة مامعة سلاح ولاسـلــــــــــــــب
وكانت الرصاصة لحياتة هي الختـــــــــــــام
وتخبرتهم البنت من قبايلكم والنســـــــــــــب
قالوا من سيبان اخذنا ثارنا والســـــــــــــلام
حملوا عنها الشايب عدل من التعــــــــــــــب
وعدلها الثاني فوق البعير هو المــــــــــــرام
وخطمت البعير لهبورك وفي عينها غضــب
وصلت الديار والكل لتعظيم الامر قــــــــــام
وخبرتهم بالحاصل ولي حصل والطــــــــلب
قالوا سيبان ياويل ويلها تستعد للعــــــــــــدام
ابونا لاتدفنونه ولا يجي فوقة تــــــــــــــرب
الابعد اخذ حقة ثم تقر عينة بالمنــــــــــــــــام
حقة غالي ويرخص لحقة عصار الشنـــــــب
هيا يا الذيابة والنشامة ذا وقت التحــــــــــــام
هبوا للقتال ومانسوا بن صلامة لي ماغلــب
بن خالتهم ومن بيت الحمر لي ماهم سقـــــام
رحلة طويلة ولكن مافيها نصــــــــــــــــــــب
حاثين الخطى ومسرعين والوعد قـــــــــــدام
وصلوا ارض سيبان وشرحهم قد انتصــــب
وشعر شاعرهم مثل غيب العــــــــــــــــــلام
خبرهم بالي حصل من خطأ ثم احـــتــــنـــب
والكل منهم دخل تيحتة خايف ومغـــــــــــتام
من هول المصيبة وعظيم الخـــطـــــــــــــب
ومن موقف الاسود الشجعان الكــــــــــــــرام
ذبحوا فيهم وخلوا الموت ذب فيهـــــــــــم ذب
هذة افعال النمارة وماعليهم مـــــــــــــــــــلام
خذوا سبعة منهم ووعدهم قد وجـــــــــــــــب
خذوا سبعة سيبان من كبار الحشـــــــــــــــام
وتنادموا سيبان وحظــــهم اشتقــــــــــــــــــب
ومتى فاد بعد الفعل التحســـــــــــــف والتندام
مادم جهلهم وخطاهـم هــــــــــو الــــــسبـــــب
ردوا بني رزغة والــكل منهم مغــــــــنــــــام
وكل واحد منهم حثا عالولد ترابة ولا انتحـب
وقالوا لة سلام يالــغالي تهنــــأ بالمــــنـــــــام
ارقد ونام نومة قريــر العـــــــين والـــهـــدب
وختامها صلوا على المصطفى الهادي الامام
(الشاعر)
*بـــــــــــــــــــــــــــن رزغــــــــــــــــــــــــــــــة*

قصيدة في هبورك

باحل في وسـط وادي المسيــلة===
حيث الرغايب وهبورك ماهي بخيــــــــلة
والكرم والجـود شاعــل شعيــلة===
والقلب سالي فيها دوب حالة وطربــــــان
ع فراق هبورك ماحصلت حيلة==
في قلبي وفي نون العين مارضى بديــــلـــة
وماشي في الوطن الــي عديـــلة====
ماساوم علية لو يملوا لي الارض ذهبان
هي مســقـط راسي وفيها القبيـلة===
وفيها ياكميــــن شهـــم يشـــب الفتـــيـــلة
ما أظلمـك يازمـن فـرقـت سيــلة===
واصبحنا كل واحد مننا في خبــــر كــــان
دام اللة قادر عـا جمــع الحلـيلــة ===
باهيم وباسافر معاك بشعري الليـــــــــلة
وان قالوا وش قع لة قلت الخليلة==
باعطيها كل الذي املك واعيش طفــــــــران